Ներդրումային հիմնադրամի միջոցներով Հայաստանում կարելի է մի փոքրիկ Արցախ կառուցել, բայց այդ միջոցները չեն հատկացնում արցախցիներին

«Արցախցիների կուտակային կենսաթոշակների գումարը՝ տասնյակ միլիարդների մասին է խոսքը, այս պահի դրությամբ հափշտակված է Հայաստանի Հանրապետության կողմից»,- այսօր հրավիրած ասուլիսում ասաց փաստաբան Ռոման Երիցյանը։

Նա նշեց, որ արցախցիների կուտակային կենսաթոշակների հարցը լուծված չէ, ՀՀ-ն որեւէ իրավասություն չունի այդ գումարի նկատմամբ, բայց ՀՀ իշխանությունները փաստացի այսօր յուրացրել են այդ գոմարը։

Ըստ փաստաբանի՝ սա հանգեցրել է նրան, որ Արցախի նախկին պաշտոնատար անձինք մասնագիտական թոշակներ չեն կարողանում ստանալ այսօր եւ դատարանի միջոցով են վերականգնում իրենց իրավունքները։

Միաժամանակ Ռոման Երիցյանն ասաց, որ սառեցված են Արցախի Հանրապետության Ներդրումային հիմնադրամում առկա ահռելի գումարները։ Ըստ նրա՝ «Արցախբանկ» ՓԲԸ բաժնետոմսերի մեծամասնությունը՝ 45 տոկոսից ավելին պատկանում է Ներդրումային հիմնադրամին, եւ հիմա հարց է առաջանում՝ «Արցախբանկի» բաժնետոմսերի հարցն ինչպե՞ս է լուծվելու։ Կամ հիմնադրամի սառեցված միջոցներն ընդհանրապես ի՞նչ ճակատագրի են արժանանալու։

Այս իրավիճակն առաջացել է, քանի որ, նրա խոսքով, Արցախի Ներդրումային հիմնադրամը Հայաստանում չի կարողանում գրանցվել որպես սուբյեկտ։ «Ներդրումային հիմնադրամի միջոցներով Հայաստանում կարելի է մի փոքրիկ Արցախ կառուցել, բայց այդ միջոցները չեն հատկացնում արցախցիներին, դրա փոխարեն սկզբում 40+10 հազար, հետո էլ 10, 20 հազար ու այլ աջակցության ծրագրեր են իրականացնում»,- հավելեց նա։