Բաքվում ելույթ ունենալով՝ Ռուսաստանի փոխվարչապետ Ալեքսեյ Օվերչուկը հայտարարել է, որ ռուս գործարարները հետաքրքրված են օկուպացված Արցախում շինարարական աշխատանքներին մասնակցելու հարցում։

«Մենք խրախուսում ենք ռուսական բիզնեսին ակտիվորեն մասնակցել այստեղ իրականացվող շինարարական նախագծերին։ Մասնավորապես, ստեղծված բարենպաստ ներդրումային միջավայրը լայն հնարավորություններ է բացում նման համագործակցության համար», – նշել է նա։

Օվերչուկը բերել է տարածաշրջանում ռուսական բիզնես գործունեության հաջող օրինակներ։ Նա հայտնել է, որ Ջաբրայիլ և Սանկտ Պետերբուրգ քաղաքների միջև համագործակցության շրջանակներում կարևոր կապեր են հաստատվել։

«Միջտարածաշրջանային համագործակցության շրջանակներում Զանգիլանի շրջանի գյուղերում կառուցվում են մանկապարտեզներ՝ Աստրախանի շրջանի միջոցներով», – ասել է Օվերչուկը։

Իր հերթին, Ադրբեջանի փոխվարչապետ Շահին Մուստաֆաևը հայտարարել է, որ Ադրբեջանը հրավիրում է ռուսական ընկերություններին ավելի ակտիվորեն մասնակցել այդ տարածքներում իրականացվող ներդրումային նախագծերին։

Վերջերս Մոսկվա կատարած այցի ժամանակ Նիկոլ Փաշինյանը բացահայտ հայտարարեց, որ Հայաստանը «փակել է» Արցախյան հարցը և «խորհուրդ է տալիս» Ռուսաստանին անել նույնը։ Նա այս հայտարարությունն արեց ի պատասխան Պուտինի այն խոսքերին, որ «Ղարաբաղը մնում է ամենացավոտ կետը» երկու երկրների հարաբերություններում։ Պուտինը և Փաշինյանը փոխանակվեցին «մեղադրանքներով» այն մասին, թե նրանցից ով է առաջինը ճանաչել Արցախը որպես Ադրբեջանի մաս՝ գործնականում համաձայնելով այս պնդման հետ։

Չնայած Փաշինյանը, որը վերադարձել է Երևան, պարբերաբար վստահեցնում է, որ չունի Ռուսաստանի հետ հարաբերությունները փչացնելու մտադրություն, Եվրամիությունն արդեն իսկ ստեղծել է երկրորդ առաքելություն, որի նպատակը ոչ թե Ադրբեջանի հետ Հայաստանի սահմանային անվտանգության մոնիթորինգը չէ, այլ ռուսական հիբրիդային սպառնալիքներից պաշտպանությունը։

Պուտինի և Փաշինյանի հանդիպումից հետո Օվերչուկը հայտարարեց, որ արևմտյան ներկայությունը խախտում է «տարածաշրջանում 1828 թվականի Թուրքմենչայի պայմանագրով հաստատված ստատուս քվոն»։ Երկու շաբաթ անց Օվերչուկը մեկնեց Բաքու, իսկ այնտեղից՝ օկուպացված Կովսական, որտեղ հայտարարեց Ռուսաստանի ներդրումների մասին Ղարաբաղում։

«Խաղաղության կամուրջի» շրջանակներում Ադրբեջանից վերադարձած հայկական ՀԿ-ները խոստովանեցին, որ Ադրբեջանը առկախել է Հայաստանի հետ «խաղաղության գործընթացը»։ Իր հերթին, Երևանը պնդում է, որ ԱՄՆ-ն կորցրել է հետաքրքրությունը TRIPP-ի նկատմամբ։

Ռուս-թուրքական ստատուս քվոն տարածաշրջանում ամրապնդվում է, և դրա գագաթնակետը կարող է լինել Պուտին-Էրդողան հանդիպումը Շուշիում, որտեղ Կարսի պայմանագիրը կփոխարինվի Շուշիի պայմանագրով։

«Ղարաբաղից տեղահանված 36 676 անձ արդեն ձեռք է բերել ՀՀ քաղաքացիություն»,- այսօր Ազգային ժողովի նիստում ասաց ՆԳ նախարար Արփինե Սարգսյանը։

Նա նշեց, որ 2025 թվականին Հանրապետության նախագահի հրամանագրով քաղաքացիություն է շնորհվել 25 670 անձի, որից 19 367-ը եղել են Արցախից բռնի տեղահանվածները։

«Բազմաթիվ են շահարկումները, որ պետությունը հատուկ քաղաքացիություն չի շնորհում Ղարաբաղից տեղահանված մեր հայրենակիցներին։ Ես նշեցի, որ անցած տարվա կտրվածքով այդ թիվը եղել է 19 367, բայց ես ուզում եմ ամփոփել մինչ այս պահը եղած իրավիճակը եւ փաստել, որ Ղարաբաղից տեղահանված 36 676 անձ ձեռք է բերել ՀՀ քաղաքացիություն, որից մի մասը եղել է անձնագրավորման ռեժիմով, մնացածը՝ նախագահի հրամանագրով։  Տեղահանված անչափահասներն ընդհանուր առմամբ եղել են 28 հազարը, որից 12 հազարն արդեն անձնագրավորման եղանակով ստացել են ՀՀ քաղաքացիություն»,- ասաց նախարարը։

«Սա թույլ է տալիս փաստելու, որ ՀՀ-ն ավելի գրավիչ պետություն է դառնում թե ազգությամբ հայերի համար, ովքեր չունեին ՀՀ քաղաքացիություն եւ թե Ղարաբաղից տեղահանված մեր հայրենակիցների ու օտարերկրյա այլ պետությունների ներկայացուցիչների համար»,- հավելեց նա։

Պատգամավոր Գառնիկ Դանիելյանը հարցրեց՝ քանի՞ արցախցի է դիմել քաղաքացիություն ստանալու համար, բայց մինչ այս պահը չեն ստացել։ «Ես դիմումներ եմ ստանում, որ մարդիկ ամիսներ շարունակ սպասում են իրենց օրվան։ Դուք ունե՞ք տվյաներ, թե քանի մարդ է սպասում, եւ ի՞նչ ժամանակահատվածի մասին է խոսքը։ Այսինքն՝ մինչեւ ընտրական պրցեսն այդ մարդիկ հնարավորություն կունենա՞ն ստանալու անձնագրեր եւ մասնակցել համապետական ընտրություններին»,- հարցրեց պատգամավորը։

Արփինե Սարգսյանն ասաց, որ այս տարվա 3,5 ամսվա ընթացքում արցախցիներից շուրջ 7000 դիմում է ստացվել։ Իսկ նախորդ տարվա նույն ժամանակահատվածում շուրջ 4000 դիմում էր ստացվել։ «Այս պահի դրությամբ ունենք պրոցեսի մեջ գտնվող շուրջ 4-5 հազար վարույթներ, որոնք ընթացքավորված են։ Եվ առաջիկայում մեծ խմբաքանակ կուղարկենք նախագահի աշխատակազմ։ Մի կողմից ես շատ ուրախ եմ, որ մեր հայրենակիցները որոշել են շարունակել իրենց կենսագործունեությունը ՀՀ-ում եւ պետության հետ ավելի ամուր կապ ձեւավորել՝ որպես քաղաքացի, մյուս կողմից, սա նաեւ մարտահրավեր է մեզ համար, որովհետեւ ավելի եծ հոսքեր կան։ Մի փոքր երկար է տեւում, բայց փորձագիտական նոր անձնակազմ ունենք ներգրավված, որպեսզի այս գործերը եւս արագ ուղարկենք նախագահի աշխատակազմ։ Ես որեւէ պրոցես չեմ կապում ընտրական գործընթացների հետ, որեւէ ձեւով հարցին չեմ անդրադառնում որպես ընտրությանը հասցնել-չհասցնելու թեմա։ Մենք ունենք հանձնառություն այն հայրենակիցների մասով, ովքեր ուզում են ստանալ ՀՀ քաղաքացիություն եւ ըստ այդ պրոցեսը կազմակերպել։ Մինչ այս պահն ունեցել ենք զրո մերժման դեպք»,- ասաց Արփինե Սարգսյանը։

Այսօր վաղ առավոտից Հակակոռուպցիոն կոմիտեն իրականացրել է խուզարկություններ Արտաշատի «Ուժեղ Հայաստան» կուսակցության  տարբեր գրասենյակներում և այս պահի դրությամբ արդեն շուրջ 14 անձ բերման է ենթարկվել։ Այս մասին այսօր՝ ապրիլի 16–ին, լրագրողների հետ զրույցում նշեց փաստաբան Յուրա Դիլանյանը՝ հավելելով, որ բերման ենթարկվածների թիվն անընդհատ աճում է։

«Առավոտվանից փորձում ենք ճշտել, թե այդ անձանց որտեղ են տարել, ինչ կարգավիճակով, ինչի համար, որևէ ձևով ինֆորմացիա մեզ չի տրվում։ Առավոտից փորձում ենք մուտք գործել Հակակոռուպցիոն կոմիտեի շենք, փորձել իրականացնել մեր վստահորդների պաշտպանությունը, սակայն մինչև այս պահը դարձյալ արգելվում են մեր մուտքը և չեն թողնում, որպեսզի բարձրանանք, իրականացնենք անձանց պաշտպանությունը։

Որևէ տեղեկություն չունենք՝ ինչի համար են անձանց տարել, ի՞նչ մեղադրանքով, ի՞նչ կասկածանքով։ Քիչ առաջ ճշտեցինք, որ վստահորդներից մեկը գտնվում է այս պահին այս շենքում, իրականացնում են հարցաքննություն։ Նրա հարազատները դիմել են փաստաբանին, որպեսզի գնա, մասնակցի, իրականացնի պաշտպանություն, սակայն դարձյալ արգելում են փաստաբանի մուտքը։ Անձը իրավունք ունի հարցաքննվել փաստաբանի, պաշտպանի ներկայությամբ, դա ևս արգելվում ու խոչընդոտվում է։

Համատարած խախտումներ, համատարած խոչընդոտներ են ստեղծում, ոտնահարվում է պաշտպան ունենալու, իրավական օգնություն ստանալու իրավունքը»,–ասաց նա։

Հարցին՝ բերման ենթարկված 14 անձանցից միայն մե՞կն է Հակակոռուպցիոն կոմիտեում, փաստաբանը պատասխանեց. «Ես չեմ կարող կոնկրետ ասել, թե բոլորն էլ այստեղ են։ Հնարավոր է մի մասն այստեղ է, մի մասն էլ անհայտ ուղղությամբ այլ  վարչական շենքում է, որևէ տեղեկություն չունենք»։

Անդրադառնալով վարկածին, որ բարեգործության արգելքի վերաբերյալ դրույթն է խախտվել, Յուրա Դիլանյանն ասաց. «Այս պահին ես չեմ կարող ասել, թե կոնկրետ ինչ մեղադրանք է, ի՞նչ մեղադրանքով են անձանց ձերբակալել, բերման ենթարկել։  Ցանկացած բան կարող են ասել։ Իհարկե, տեսնում ենք, որ համարյա բոլոր բերման ենթարկված, ձերբակալվածները մեկ մեղադրանքով են, որ իբր բարեգործության արգելք են խախտում, իբր ընտրակաշառք են բաժանում, իբր այսպես կոչված պայմանավորվածություններ են ձեռք բերում»։

news.am