ԱՄՆ նախագահ Դոնալդ Թրամփը հայտարարեց, որ Պարսից ծոցի երկրների խնդրանքով հետաձգում է երեքշաբթի օրը նախատեսված Իրանի վրա նոր հարվածը, քանի որ «լուրջ բանակցություններ են ընթանում»։

«Ընթացիկ լուրջ բանակցությունների ընթացքում Կատարի էմիր Թամիմ բին Համադ բին Խալիֆա Ալ Թանին, Սաուդյան Արաբիայի թագաժառանգ Մուհամմեդ բին Սալմանը և ԱՄԷ նախագահ շեյխ Մուհամմեդ բին Զայեդ Ալ Նահյանը խնդրել են ինձ հետաձգել մեր հարձակումը Իրանի վրա, որը նախատեսված էր վաղը», – գրել է Թրամփը իր սոցիալական ցանցում՝ Truth Social-ում։

Թրամփն ասել է, որ իրեն տեղեկացրել են ԱՄՆ-ի համար «լիովին ընդունելի» գործարքի հնարավորության մասին՝ հավելելով. «ԻՐԱՆԻԸ ՄԻՋՈՒԿԱՅԻՆ ԶԵՆՔ ՉԻ ՈՒՆԵՆԱ»։

«Երկու կամ երեք օր»։ «Մենք շատ երկար ժամանակահատվածի մասին չենք խոսում», – ասել է Թրամփը՝ հավելելով, որ հույս ունի, որ Իրանը կհամաձայնի խաղաղության համաձայնագրի, և ԱՄՆ-ն ստիպված չի լինի վերսկսել ռազմական գործողությունները. «Եթե մենք կարողանանք լուծել սա առանց ամբողջը ռմբակոծելու, հիանալի կլինի»։

Կան հաղորդագրություններ, որ Իրանը համաձայնել է հանձնել իր հարստացված ուրանը, բայց ոչ թե ԱՄՆ-ին, այլ Ռուսաստանին, և սա արդեն քննարկման փուլում է։

«Ուժեղ Հայաստան» կուսակցության վարչապետի թեկնածու Սամվել Կարապետյանը հանդես է եկել հրատապ ուղերձով։

«Այսօր մեր ժողովրդի համար ամոթալի ու խայտառակ օրերից մեկն է։ Այսօր վարչապետի պաշտոնը դեռևս զբաղեցնող Փաշինյանը չափազանց լկտի, ես կասեի՝ անհավասարակշիռ վերաբերմունք է ցուցաբերել մեր երկրի քաղաքացիների նկատմամբ։ Մարդը, ով ժամանակին ասում էր, թե մեր երկրում կա երեք միլիոն վարչապետ, կորցրել է ինքնատիրապետումը եւ իրականության զգացումը։

Այսօր իր քարոզարշավի ժամանակ ժողովրդին իր նախընտրական ծրագրերը ներկայացնելու փոխարեն Փաշինյանը ձեռքերին ազատություն է տվել և հարձակվել անհետ կորած մեր հերոսի քրոջ վրա, և շրջապատված լինելով թիկնապահներով, Փաշինյանը հարձակվել և վիրավորել է երիտասարդ տղամարդու և այսպես շարունակ:

Սիրելի հայրենակիցներ, ուզում եմ ձեզ մի բան ասել, անգամ 20 օր Փաշինյանի՝ երկրի ղեկավար մնալը վտանգավոր է մեր երկրի համար, մեր բոլոր հակառակորդները տեսնում են, թե ինչ հոգեբանական անհավասարակշիռ վիճակում է գտնվում մեր երկրի ժամանակավոր ղեկավարը, նրա յուրաքանչյուր օրը վարչապետի պաշտոնում թուլացնում է մեր երկիրը։ Փաշինյանը խայտառակում է ոչ միայն մեր պետությունը, այլև հայի, հայ ժողովրդի, հայ տղամարդու կերպարը, մենք դա թույլ չենք տալու, հունիսի յոթին մեր ժողովուրդը վերջ կտա ազգային խայտառակությանը»,– ասել է նա։

«Հայաստան» դաշինքի հայտարարություն է տարածել․

«Հունիսի 7-ի ընտրությունների նախընթաց ժամանակահատվածն ընթանում է ներքաղաքական մթնոլորտի անթույլատրելի լարվածությամբ և ակնհայտորեն դուրս է եկել քաղաքական պայքարի շրջանակներից։

Գործող վարչախմբին մերժող և աներկբա թափ առնող հանրային դրսևորումներին զուգահեռ՝ ռեժիմը փորձում է լռեցնել քաղաքական ընդդիմախոսներին, չեզոքացնել քաղաքացիների խոսքի ազատությունը, ճնշել ազատ կամարտահայտումը, երկրում խորացնել վախի մթնոլորտն ու ներազգային թշնամանքը։

Խորացող ավտորիտար ռեժիմի կողմից որդեգրված հակասահմանադրական և քրեորեն հետապնդելի վարքն ու գործիքակազմն անհնար են դարձնում ընտրությունների ազատությունն ու մրցակցայնությունը։

Վարչախումբը բացառապես մեկ նպատակ է հետապնդում՝ ընդդիմադիր ուժերի և այլախոհների նկատմամբ ուժի և վարչական ռեսուրսների անթույլատրելի կիրառմամբ հասնել վերարտադրության։

Այս նպատակին են ծառայում պատժիչ և հակասահմանադրական գործողությունները, որոնք ներառում են՝

• Քրեական հետապնդումներ և հալածանքներ, ինստիտուցիոնալ ռեպրեսիաներ։

• Ընտրովի արդարադատություն, վարչական ռեսուրսի բացահայտ չարաշահում։

• Դատական իշխանության ակնհայտ կախվածություն, ինչը թույլ չի տալիս, որպեսզի իշխանության հակասահմանադրական գործողություններն արժանանան իրավական գնահատականի։

• Վարչախմբի ղեկավարի կողմից դատախազությանը և իրավապահ համակարգին տրված բացահայտ ու հրապարակային պատժիչ հրահանգներ, այդ թվում՝ քաղաքական ընդդիմախոսներին բանտարկելու կամ պատժելու հանձնարարություններ։

/17․05․2026 թ․ հոգեբուժարանում կախվել է ՀՀ քաղաքացի, որին իրավապահ մարմինները մեկ օր առաջ մեկուսացրել էին Ն․ Փ․-ի քարոզչական պաստառը վնասելու մեղադրանքով/։

• Հանրության, առանձին քաղաքացիների և ընդդիմադիր առաջատար ուժերի առաջնորդների նկատմամբ հրապարակային ահաբեկում, հաշվեհարդարի սպառնալիքներ և կոչեր։

• Ոչ նորմատիվ բառապաշար, հասցեական թիրախավորում, ատելության խոսք, ներազգային պառակտվածության ու թշնամանքի մթնոլորտի խորացում, վախի և ահաբեկման մթնոլորտի ձևավորում։

• Մայիսի 18-ին, ուղիղ եթերում, Նիկոլ Փաշինյանը քաղաքական հիմնական երեք ընդդիմախոսների, ինչպես նաև սովորական քաղաքացիների հասցեին հնչեցնում է աննախադեպ սպառնալիքներ, որոնք ուղեկցվում են վրեժխնդրության կոչերով և ոչ նորմատիվ հայհոյախառն խոսքով։

Ցավոք, միջազգային կազմակերպությունների կրկնակի ստանդարտները, կանխակալ մոտեցումներն ու ոչ հասցեական վարքագիծը խորացնում են Հայաստանում անպատժելիության մթնոլորտը, վարկաբեկում միջազգային ինստիտուտները, սասանում ժողովրդավարության նկատմամբ հավատը՝ լրջագույնս կասկածի տակ դնելով հավաքական Արևմուտքի՝ Հայաստանում իրապես ժողովրդավարական սկզբունքներով իշխանության ձևավորման նկատմամբ շահագրգռվածությունը։

Դիմում ենք Հայաստանում հավատարմագրված դեսպանատներին և դիտորդական առաքելություն իրականացնող միջազգային կազմակերպություններին՝ ակնկալելով համարժեք վերաբերմունք և գնահատական։

Ակնկալում ենք անհետաձգելի հանդիպում՝ առավել հանգամանալից քննարկելու, ներկայացնելու և գնահատելու իշխանությունների կողմից որդեգրված հակասահմանադրական ընթացքը»։

Իրանը իր մեկնաբանություններն է ներկայացրել Միացյալ Նահանգներին՝ ի պատասխան Վաշինգտոնի կողմից հակամարտության կարգավորման ծրագրում կատարված ճշգրտումների, ճեպազրույցի ժամանակ հայտարարել է Իրանի արտաքին գործերի նախարարության խոսնակ Իսմայիլ Բաղային։ «Չնայած այն հանգամանքին, որ ԱՄՆ-ն բացահայտորեն հայտարարել է այս [իրանական – խմբ.] նախագծի մերժման մասին, մենք մի շարք մեկնաբանություններ և ճշգրտումներ ենք ստացել պակիստանյան կողմի միջոցով։ Մենք վերանայել ենք առաջարկները, և, ինչպես հայտարարվել էր երեկ, մեր տեսակետները փոխանցվել են ամերիկյան կողմին», – նշել է Բաղային։

Նա ընդգծել է, որ Պակիստանը հանդես է գալիս որպես միջնորդ Թեհրանի և Վաշինգտոնի միջև երկխոսության մեջ։

Tasnim լրատվական գործակալության փոխանցմամբ՝ Միացյալ Նահանգները համաձայնել է բանակցությունների ընթացքում դադարեցնել իրանական նավթի դեմ պատժամիջոցները։

Գործակալության տվյալներով՝ Թեհրանը, իր հերթին, պնդում է բոլոր պատժամիջոցների վերացման վրա, մինչդեռ Վաշինգտոնը պատրաստ է վերացնել միայն ԱՄՆ ֆինանսների նախարարության պատժամիջոցները՝ մինչև վերջնական համաձայնության հասնելը։

Իրանը գործարկել է պետական ​​սեփականության տակ գտնվող Hormuz Safe թվային ծովային ապահովագրական հարթակ՝ Պարսից ծոցով և Հորմուզի նեղուցով տարանցիկ նավերի համար։ Այս մասին հայտարարվել է նոր PGSA-ի պաշտոնական X հաշվում։

Հարթակը աջակցվում է Իրանի էկոնոմիկայի նախարարության կողմից, որն օգտագործում է կրիպտոարժույթ ապահովագրական պոլիսների շրջանակներում ուղղակի վճարումների համար և չի պահանջում SWIFT կամ արևմտյան միջնորդներ։